Partia e Drejtësisë ka rithemeluar degën në Podujevë, kryetar i së cilës u zgjodh Esat Ejupi. Në këtë Kuvend Zgjedhor morën pjesë 65 delegatë, të cilët zgjodhën edhe Kryesinë e re të kësaj dege.

Sipas njoftimit për media nga kjo parti, të pranishmëve me një fjalë rasti iu drejtua kryetari i Partisë së Drejtësisë Ferid Agani, i cili uroi kryetarin e zgjedhur të degës së PD-së në Podujevë Esat Ejupin.

“Me lejoni të shpreh kënaqësinë e madhe që gjendem në mesin tuaj që bëtë një kthesë të madhe në rifillimin e Partisë së Drejtësisë në qytetin e Podujevës. Kjo paraqet shkrirjen unike të identitetit kombëtar, shpirtëror të qytetarëve të vendit tonë. Shkrirjen e vlerave të atdhedashurisë, gatishmërisë për sakrificë në ditët më të vështira, vlerat e besimit në Zotin e Madhërishëm, vlerave të traditës kombëtare të familjeve, vlera që ruhen me xhelozi nëpër dekada u qëndrojnë edhe sfidave të kohës bashkëkohore.”

Më tej Agani theksoi: “Asgjë nuk është e rastësishme që Partia e Drejtësisë të zhvillon një aktivitet të tillë në mesin e qytetarëve. Dega e Partisë së Drejtësisë në Podujevë e ka dëshmuar se nuk është degë me dy tri e katër fytyra që patëm fatin e keq të provojmë me disa degë të partisë sonë nëpër disa Komuna. Por është e vendosur që aktivitetin e saj ta zhvilloj mbi bazën e parimeve pa interesa të ngushta qofshin individuale, klanore por mbi bazën e parimeve të vendosura me programin e partisë tonë.”

“Uroj që bashkëpunimi i organeve qendrore të partisë dhe kryesisë së re të kësaj dege të jetë edhe më cilësor sesa që ka qenë në periudhën e kaluar, të mbi ndërtoj atë që është arritur në periudhën e kaluar dhe që së bashku të shkojmë drejtë sukseseve të reja, u shpreh në fund Agani.

Ndërsa i sapo zgjedhuri kryetar i PD-së në Podujevë Esat Ejupi, falënderoi të gjithë delegatët për besimin e dhënë duke u zotuar se me përkushtim dhe nderë do të mundohem që me të gjitha kapacitet intelektuale dhe morale që të jap maksimumin, të bëjmë organizimin e degës dhe elektoratit në përgjithësi.

“Puna, aktiviteti, transparenca, bashkëpunimi, ekipet profesionale dhe koordinimi janë bazë e shëndoshë për të realizuar objektivat tona me ndihmën e Zotit të Madhërishëm. Ju falënderoj të gjithëve që me besuat që të jem zë i juaji për një jetë më të mirë për qytetarët e Podujevës,” theksoi Ejupi.

Të pranishmit i përshëndeti nënkryetari i PD-së Ardian Sejdiu, i cili theksoi: “PD nga dita në ditë po fuqizohet dukshëm dhe si e tillë është e gatshme me i bartë përgjegjësit në drejtim të shtetndërtimit dhe forcimit të institucioneve shtetërore në të gjitha segmentet.”